मुख्य सामग्रीमा जानुहोस्
६ मंसिर २०८३ आइतबारबेलुका ६:१३ Sunday, November २२, २०२६

सुखडका डीएसपी चौधरीको शैलीमाथि प्रश्न : मिडियालाई झुटो सूचना, निर्दोष रातभर थुनिए

शेयर१०२.६K०

कैलालीको घोडाघोडी नगरपालिका १ सुखडमा रहेकाे एक होटलमा व्यवसायीहरूबीच भएको झडप प्रकरणमा प्रहरीले मिडियालाई नै गलत सूचना दिएको पाइएको छ। आइतबार राति सुखडको दहित रेस्टुरेन्टमा भएको घटनामा जिल्ला प्रहरी कार्यालय कैलालीले “पाँचै जना नियन्त्रणमा रहेको” जानकारी दिएको भए पनि वास्तविकता फरक भेटिएको हो।

आइतबार राति भएको निर्माण व्यवसायीबीचको झडपपछि पाँच जनाविरुद्ध मुद्दा दर्ता गरिएको थियो। सोमबार जिल्ला प्रहरी कार्यालय कैलालीका सूचना अधिकारी प्रहरी नायब उपरीक्षक योगेन्द्र तिमिल्सिनाले निर्भीक पोष्टलाई पाँचै जना प्रहरी नियन्त्रणमा रहेको बताएका थिए। तर मुद्दा दर्ता गरिएकामध्ये तीन जना मात्रै प्रहरी नियन्त्रणमा रहेको खुलेको छ। बाँकी दुई जनालाई प्रहरीले अझै नियन्त्रणमा लिन सकेको छैन।

बर्दगोरिया गाउँपालिका–१ का ४५ वर्षीय शिवराज कुँवर, बर्दगोरिया–५ का २६ वर्षीय ओम थापा र बर्दगोरिया–२ का २६ वर्षीय श्रीराम भट्ट प्रहरी नियन्त्रणमा रहेका छन् । अन्य २ जनालाई अहिलेसम्म प्रहरीले नियन्त्रणमा लिन सकेको छैन।

यसरी पक्राउ नै नभएका व्यक्तिलाई समेत “नियन्त्रणमा रहेको” भन्दै प्रहरीले मिडियालाई सूचना दिएको घटनाले प्रहरीको सूचना प्रणाली र पारदर्शितामाथि प्रश्न उठाएको छ।

यस्तै, उक्त घटनामा प्रहरीले धाकधम्कीपूर्ण शैली अपनाएको आरोप समेत लागेको छ। व्यवसायीहरूबीच झडप भएको घटनामा प्रत्यक्ष संलग्न नभएका होटल सञ्चालकलाई समेत प्रहरीले बिना कसुर एक रात नियन्त्रणमा राखेको थियो।

घटनापछि हालै इलाका प्रहरी कार्यालय सुखडमा सरुवा भएर आएका प्रहरी नायब उपरीक्षक प्रसन्नराज चौधरीको भूमिकामाथि समेत प्रश्न उठ्न थालेको छ। स्रोतका अनुसार झडपमा संलग्न पक्षहरू “हामी मिल्छौं, यो सामान्य खानपिनको विषय हो” भन्दै विवाद समाधानतर्फ जान खोज्दा समेत प्रहरीले जबरजस्ती मुद्दा दर्ता गराएको आरोप छ।

“तिमीहरू मुद्दा दर्ता गर, होइन भने सबैलाई थुन्छु,” भन्दै डिएसपी चौधरीले दबाब सिर्जना गरेको स्रोतको दाबी छ। त्यसपछि मात्रै मुद्दा दर्ता प्रक्रिया अघि बढाइएको बताइएको छ।

मिडियालाई दिएको गलत सूचना र झडपमा संलग्न नरहेका होटल सञ्चालकलाई थुनिएको विषयमा बुझ्न इलाका प्रहरी कार्यालय सुखडका प्रमुख डीएसपी प्रसन्नराज चौधरीलाई पटकपटक सम्पर्क गर्दा उनको फोन उठेन। यता जिल्ला प्रहरी कार्यालय कैलालीका प्रवक्ता तथा सूचना अधिकारी योगेन्द्र तिमिल्सिनाले भने “आफूलाई आएको रिपोर्टका आधारमा जानकारी दिएको” बताएका छन्।

प्रकाशित :-

यो खबर पढेर तपाईलाई कस्तो महसुस भयो ?

शेयर१०२.६K०
Testing Theme

Testing Theme

Online Nepali News Portal

अहिलेसम्म कुनै प्रतिक्रिया छैन। पहिलो प्रतिक्रिया दिनुहोस्।

प्रतिक्रिया दिनुहोस्

प्रतिक्रिया दिन लगइन अनिवार्य छ। लेखेको मेटिँदैन।