अछामको ढकारी गाउँपालिकाले सेवा प्रवाह तथा शैक्षिक गतिविधि प्रभावित हुन नदिन शनिबार पनि कार्यालय तथा विद्यालय सञ्चालन गर्ने निर्णय गरेको छ।
गाउँपालिकाको कार्यपालिका बैठकबाट गरिएको निर्णयअनुसार नेपाल सरकारले शनिबार र आइतबार दुई दिन सार्वजनिक बिदा दिने व्यवस्था गरे पनि स्थानीय तहमा सेवा प्रवाहलाई निरन्तरता दिन कार्यालय र विद्यालय सञ्चालन गरिने भएको हो।
निर्णयअनुसार गाउँपालिका, वडा कार्यालय तथा स्वास्थ्य संस्थाहरू सोमबारदेखि शुक्रबारसम्म बिहान १० बजेदेखि साँझ ५ बजेसम्म सञ्चालन हुनेछन् भने शनिबार बिहान १० बजेदेखि दिउँसो ३ बजेसम्म सेवा प्रदान गरिनेछ। आइतबार भने बिदा रहने व्यवस्था गरिएको छ।
यस्तै, सामुदायिक तथा संस्थागत विद्यालयहरू सोमबारदेखि शुक्रबारसम्म बिहान १० बजेदेखि साँझ ५ बजेसम्म सञ्चालन हुनेछन् भने शनिबार बिहान १० बजेदेखि दिउँसो १ बजेसम्म पठनपाठन हुने गाउँपालिकाले जनाएको छ।
प्रमुख प्रशासकीय अधिकृत नरेशबहादुर बोहराद्वारा जारी सूचनाअनुसार उक्त निर्णय असार १ गतेदेखि नै लागू भएको छ। साथै सम्बन्धित कर्मचारी, शिक्षक, विद्यार्थी, सेवाग्राही तथा सरोकारवालालाई निर्णयको प्रभावकारी कार्यान्वयन गर्न आग्रह गरिएको छ।
यसअघि नेपाल सरकारले गत चैत २३ गतेदेखि आइतबार र शनिबार दुई दिन सार्वजनिक बिदा दिने निर्णय गरेको थियो। सो निर्णयअनुसार सरकारी कार्यालय बिहान ९ बजेदेखि साँझ ५ बजेसम्म तथा विद्यालय बिहान १० बजेदेखि अपराह्न ४ बजेसम्म सञ्चालन गर्ने व्यवस्था लागू गरिएको थियो।





अहिलेसम्म कुनै प्रतिक्रिया छैन। पहिलो प्रतिक्रिया दिनुहोस्।